តារាកំប្លែងដ៏ល្បី ប្រចាំស្ថានីយ៍ ទូរទស្សន៍ ស៊ីធីអ៊ិន គឺនាយ ពាក់មី បានបង្ហោះវីដេអូឃ្លីប មួយភ្លាមៗដើម្បី ធ្វើការសុំ ព្រះរាជទានទោស ពីព្រះមហាក្សត្រ និងសុំទោស ទៅដល់ប្រជាជនខ្មែរ បន្ទាប់ពីលោក បានជ្រុលខុស លើសលួសក្នុងការ សម្តែងរបស់ខ្លួន នៅក្នុងកម្មវិធី រាត្រីកំសាន្ត កាលពីថ្ងៃទី០៩ ខែឧសភា ឆ្នាំ២០១៥ កន្លងទៅនេះ។
តាមរយៈឃ្លីបវីដេអូ ដែលបានបង្ហោះនៅលើ ទំព័រហ្វេសប៊ុក ដោយក្នុងនោះ មាននាយ ពាក់មី និងប្រពន្ធ របស់នាយ បានចេញមក រៀបរាប់ទាក់ទង ទៅនឹងឈុតសម្តែង នៅក្នុងកម្មវិធី រាត្រីកំសាន្ត ត្រង់កន្លែងដែល រូបនាយ (នាយ ពាក់មី) ឲ្យ នាយប៊ូម យកក្រដាសប្រាក់ ១ម៉ឺនរៀល មកដាក់គៀប នឹងជើងនោះ ត្រូវបាននាយ ពាក់មី បញ្ជាក់ថា ចំពោះកាយវិការនេះ គឺនាយមិនបាន ចាប់អារម្មណ៍ បន្តិចណាឡើយ ជាពិសេសនោះគឺ មិនមានចេតនា ណាមួយ ក្នុងការមើលងាយ ឬប្រមាថទៅដល់ ព្រះមហាក្សត្រ នោះទេ ដោយសារតែ នៅលើក្រដាសប្រាក់ ១ម៉ឺនរៀល គឺមានរូបព្រះឆាយាល័ក្ខ ព្រះមហាក្សត្រ ដូច្នេះហើយទើបលោក យល់ថា ទង្វើអចេតនាមួយនេះ គឺមិនសមរម្យ និងខុសឆ្គង យ៉ាងខ្លាំង។
តែយ៉ាងណាមិញ បន្ទាប់ពីបាន ដឹងខ្លួនថា បានជ្រុលខុស និងសម្តែងលើសលួស ហើយនោះ តារាកំប្លែង ដ៏ល្បីរូបនេះ ក៏បានប្រញាប់ ចេញមុខសុំ ព្រះរាជទានទោស ភ្លាមៗចំពោះ ព្រះមហាក្សត្រ និងបានបង្ហាញពី ភាពសោកស្តាយ យ៉ាងខ្លាំងចំពោះ ទង្វើអចេតនា ដោយមិនដឹងខ្លួន មួយនេះ៕
